Umiyak sa Itlog

Hindi ako yun. Yung kapatid ko.

Mangyari kasi, nung bata pa ako, (mga ocho anyos ata ako nun, yung kapatid ko mga kwatro anyos noon) tuwing Easter Sunday, may sarili kaming version ng Easter Egg Hunt.

Imbes na lumabas at pumunta ng mall para doon makisaya, sa bahay lang namin ito ginagawa. Ciempre si Mama ang nagtatago ng itlog (na pula ) habang kami naman ay naghihintay lang na sabihin nyang “Go!” para magsimula na ang hanapan.

At naganap na nga, ito na ang eksena, hanap dito, hanap doon.

Naghanap sa likod ng mga garapon, sa lalagyan ng mga tindang gulay, sa likod ng mga kahon ng ibang panindang hindi pa naaayos, at sa likod ng iba pang mga kung anu-anong bagay sa tindahan.

Kinakarir ko talaga ang paghahanap kasi may premyo eh.

Eto na, nakita ko ang itlog sa ilalim ng mga bigas na hindi pa naitatakal. Yey, panalo ako.

Siyempre ipinakita ko na sa aking Mama ang itlog na pula, excited akong kunin ang aking premyo. Nang biglang umiyak ang kapatid ko.

Iyak ba? Hindi eh, palahaw. As in talagang malakas, at ayaw tumigil.

Ano pa nga ba ang sumunod na eksena?

Eh di ibinigay ko na lang sa kanya ang napanalunan kong tsokolate. Hirap maging Ate.

Dati yun. Ngayon, wala na kaming ganung pakulo sa bahay, ngayon kami na ang hinahanap ng mga itlog (mga kamag-anak naming lalaki na may mga maliliit na tsikiting) para mangamusta at magpalipas ng Easter Sunday.

Nga pala, bago ko makalimutan, Happy Easter sa ating lahat.

Nakahanap ka ba ng itlog ngayon?

Eksenang Nakakastress sa FX

Pauwi na ako kahapon galing sa isang mahabang araw ng trabaho. Alam mo yung pakiramdam na pagod na pagod ka tapos gusto mo lang makauwi agad sa bahay para makapagpahinga? Yun ang pakiramdam ko kahapon.

Pero dun sa nasakyan kong FX, hindi ako narelax. Parang na-stress nga ako sa daming eksena. Gusto mo ng clues? Cge kukuwentuhan kita.

Eksena No.1

Nauna akong sumakay sa harapan ng fx, katabi ng driver. Nagsisimula ng mapuno ng sakay ang fx, yung sa tabi ko na lang ang kulang.

Lakas ng AC, medyo mabango sa loob.

Nakakarelax.

Eto na kamo ang sunod na eksena. May ginang na sumakay sa fx dun sa tabi ko umupo, sabay bungad ng:

“Ano ba yan, ang tapang naman sa ilong ng pabangong yan!”

Hindi ako yun, although nagpabango ako, yung car freshener ang tinutukoy nya.

At hindi pa nagkasya sa todong komento nya dun, inulit-ulit pa nya ang reklamo nya sa ‘bango’ na yun at talagang parang tumatalbog lang na cd kung papakinggan mo. Nakakastress di ba?

Eto ang pamatay, sa kakareklamo nya sa amoy, bigla ba naman binuksan yung dalang burger at dun kumain sa loob ng fx. So alam mo na ang ending di ba? Yung unang mabangong amoy sa loob ng fx, ayun, nangamoy burger na yung loob. Kakastress talaga.

Pero at least, natahimik naman siya.

Eksena No. 2

Yung umuupo sa gitna, madalas ang eksena sila ang taga-abot ng pamasahe ng mga nakaupo sa likod. Eto na, yung isa doon sa nasakyan ko, nagreklamo ba naman kasi lagi na lang daw siya ang nag-aabot ng pamasahe sa driver.

Magreklamo ba, eh sa gitna ka naman nakaupo, natural aabutin mo yung pera di ba?

Ate naman, para mabaligtad ang eksena next time, dun ka sa likod umupo. Or kung ayaw mo talaga ng may nakikisuyo sa iyo sa pag-aabot ng pamasahe, mag-taxi ka na lang.

Eksena No. 3

Yung isa naman sa gitna nakaupo, parang naka-register ata sa unlimited na calls. Imagine mula Makati hanggang sa amin sa Cainta, nakikipag-usap siya sa celfone. Nakakaloka di ba?

Well, okay lang naman kung medyo mahina yung boses nya habang nakikipag-usap siya. Ang siste, grabe, alam na ata lahat ng pasahero ng fx kung ano ang nangyari sa kanya at doon sa ex boyfriend nya na lumandi sa kapatid nyang disisais anyos.

Kung makipag-usap parang nasa sarili siyang sasakyan. Que horror!

Kung hindi ka ba naman ma-stress talaga di ba?

Ayan, ang ending ko, imbes na marelax ako, buong byahe akong nagpigil ng inis. Nakaka-stress naman talaga di ba? Pero habang tinatype ko to, natatawa na lang ako. Kung ikukuwento ko kasi lahat ng mga eksena sa fx na natatandaan ko, pwede na akong gumawa ng buong blog about that.

Ikaw, kung sumasakay ka sa fx, ano ang nakakapagpa-stress sayo?

Photo credit: hubpages.com